幾凍都好 勿用熱水洗面!

Posted by Ys Editor 12/04/2018 0 Comment(s) 美容護膚,

幾凍都好,記住洗面千祈唔好用熱水啊,因為會洗去保護皮膚嘅皮脂膜,令皮膚變得愈來愈乾㗎;而太冰凍嘅水亦會刺激皮膚,較難洗淨皮脂嘅油污,所以最好就係用30℃左右嘅溫水喇。大家日日都會洗面,究竟點樣洗先乾淨?

Double Cleansing之重要
成日聽人講,用清水洗面得啦,使乜搞咁多嘢? 幾十年前可能都仲啱嘅,但今時今日空氣咁污染,出街行一轉再抹下塊面就知,用清水洗面不如唔好洗,仲可以慳番啲水!咁用洗面產品係咪就得呢?答案係得,不過要用兩種唔同產品來個Double Cleansing,先足夠洗乾淨塊面㗎!

第一洗:用有卸妝功效嘅潔面產品,先卸走化妝品同埋肌膚表面嘅塵埃、污染物,就算冇化妝,單搽防曬都要卸妝㗎。
※呢個步驟只適用喺晚上洗面,早上可以Skip。
※暗瘡皮膚最好避免用卸妝油,以免阻塞毛孔,令痘痘越生越多喔。

第二洗:用潔面產品再洗一次,將之前可能殘留嘅化妝品徹底洗淨之餘,再溫和潔淨毛孔嘅油脂分泌,清除粉刺同老化嘅角質層,令皮膚潔淨,之後搽嘅護膚品先會吸收得好。
※洗完面後要用毛巾印乾,唔好等佢自然風乾,咁係會帶走皮膚水份,變得好乾㗎;用毛巾亦千祈要記住係印乾,唔好大力來回捽,否則好易捽出皺紋,真係搽幾多防皺Cream都補唔番。

黃金30秒補水
把握洗面後嘅黃金30秒,立即使用護膚品,若然唔趕緊抹上爽膚水/化妝水等後續保養品,空氣就會抽走皮膚水份,會迅速感到乾燥繃緊,乾紋會隨之而來,即使幾咁努力搽保濕護膚品,保養功效亦都會大大降低㗎。抹完爽膚水,就可以繼續其他護膚程序喇。